Түркістан облысы шетелдік инвестицияны тарту мен өндіріс секторын дамытуда тың серпін алып келеді. Бұл жолы Түркияның жетекші фармацевтикалық компанияларының бірі — ORZAX өңірде биологиялық белсенді қоспалар (ББҚ) шығаратын ірі өндірістік кешен салуға ниетті екенін мәлімдеді. Жобаның жалпы құны 40 миллион АҚШ долларын құрайды. Бұл – Түркістан облысына келіп жатқан ірі халықаралық инвестициялардың бірі ғана емес, аймақтың экономикалық әлеуетін арттыратын нақты қадам.
Түркістан облысының әкімі Нұралхан Көшеров пен ORZAX компаниясының басшылығы арасында өткен ресми кездесуде өндірістік жобаны іске асыру жолдары егжей-тегжейлі талқыланды. Зауыттың «TURAN» арнайы экономикалық аймағы аумағында бой көтеруі көзделіп отыр. Бұл аймақ – Мемлекет басшысының тікелей тапсырмасымен құрылған және инвесторларға жеңілдетілген салық, әкімшілік режим ұсынып, қолайлы бизнес жүргізу ортасын қалыптастырып отырған бірегей өндірістік алаң.
ORZAX компаниясының жобасы аясында жылына 35 миллион қорап биологиялық белсенді қоспа өндіріледі деп жоспарлануда. Бұл өнімдерге әлемдік нарықта жоғары сұраныс бар. Жоба іске қосылғанда 500-ден астам адамды тұрақты жұмыспен қамту көзделіп отыр. Бұл тек жұмыс орындарын көбейтіп қана қоймай, мамандардың кәсіби біліктілігін арттыру, отандық фармацевтика нарығын дамыту және өңірдің экспорттық әлеуетін арттыруға зор үлес қосады.
Облыс әкімі Нұралхан Көшеров бұл жобаның өңірлік экономика үшін ерекше маңызды екенін атап өтіп, әкімдік тарапынан толық қолдау көрсетілетінін мәлімдеді. Оның айтуынша, жергілікті билік құрылысқа қажетті инфрақұрылымды жүргізу, құжаттамаларды рәсімдеу, рұқсат беру рәсімдерін жеделдету бойынша барлық мүмкіндіктерді қарастырып, жобаның кедергісіз жүзеге асуына жол ашады.
– Түркістан – ашық әрі серіктестікке дайын өңір. Біз бұл жобаны барынша қолдаймыз. Түркиялық компанияның сенімі – біздің аймақтың инвестициялық климатын жоғары бағалауының дәлелі. Бұл зауыт тек Түркістанның ғана емес, тұтас еліміздің фармацевтикалық қуатын күшейтеді, – деді облыс әкімі.
Түркияда орналасқан ORZAX – табиғи ингредиенттер негізінде жоғары сапалы ББҚ өндіретін халықаралық деңгейдегі алпауыт компания. Қазіргі таңда компания 100-ден астам өнім түрін шығарады: пробиотиктер, өсімдік экстрактылары, дәрумендер мен минералдар, коллагендер және Омега-3 қоспалары. Бұл өнімдер әлемнің 50-ден астам еліне экспортталады. Түркия нарығында рецептсіз берілетін ББҚ сегментінде компания көшбасшы саналады.
Түркістан облысы соңғы жылдары инвестициялық белсенділікті күшейтіп, отандық және шетелдік кәсіпкерлерге жан-жақты қолдау көрсетуде. ORZAX зауытының іске қосылуы аймақтың фармацевтикалық өндірісін қалыптастыруға негіз болып, жаңа индустриалды кластердің құрылуына жол ашады. Сонымен қатар бұл жобаның мультипликативті әсері де жоғары — шикізат жеткізуден бастап, логистика, қызмет көрсету және сату желілерінің дамуына дейін әсер етеді.
2026 жылдың соңына дейін толық іске қосылатын бұл зауыт – аймақтың әлеуметтік-экономикалық дамуына, халықтың табысын арттыруға, еңбекпен қамтуға және жаңа технологиялар трансфертіне нақты үлес қосатын маңызды өндірістік бастама.
Пікір қалдыру