Шымкент қаласының Денсаулық сақтау басқармасы мен Полиция департаментінің бірлескен бастамасы негізінде қаланың бірқатар ірі медициналық мекемелерінде тұрақты полиция бекеттері жұмыс істей бастады. Бұл шешім соңғы уақытта денсаулық сақтау саласында орын алып жатқан медицина қызметкерлеріне қатысты күш көрсету, қорқыту және қауіп төндіру оқиғаларының жиілеп кетуіне байланысты қабылданған.
Полиция қызметкерлері қазірдің өзінде келесі алты мекемеде кезекшілік атқаруда:
-
№1 қалалық клиникалық аурухана,
-
№2 қалалық аурухана,
-
№3 қалалық аурухана,
-
Перинаталдық орталық,
-
Қалалық перзентхана,
-
Шымкент қалалық балалар ауруханасы.
Бұл бекеттердің негізгі міндеті — медицина қызметкерлері мен пациенттердің қауіпсіздігін қамтамасыз ету, емдеу мекемелерінде туындауы мүмкін қақтығыстар мен төтенше жағдайларға жедел әрекет ету, құқықбұзушылықтардың алдын алу. Сонымен қатар, бұл шара медициналық ұйымдардағы тәртіпті күшейтіп, дәрігерлер мен мейірбикелердің өз қызметтік міндеттерін алаңсыз атқаруына мүмкіндік береді.
Айта кету керек, Мемлекет басшысы Қасым-Жомарт Тоқаев медицина қызметкерлерінің қауіпсіздігіне ерекше назар аударып, қызметтік міндетін орындау барысында оларға қатысты жасалатын күш қолдану фактілері үшін жазаны қатаңдату туралы тапсырма берген болатын. Бұл мемлекеттік деңгейде медицина қызметкерлерінің мәртебесін көтеру және олардың құқығын қорғау бағытындағы нақты қадамдардың бірі.
Сонымен қатар, Шымкент қалалық Денсаулық сақтау басқармасы қала аумағындағы бірнеше басқа емдеу мекемелерінде де қауіпсіздік шараларын күшейтуде. Атап айтқанда, «Қалалық жұқпалы аурулар ауруханасы», «Т. Орынбаев атындағы гипербариялық оксигенация орталығы» және «Хадиша» емханасында тәуліктік кезекшілік ұйымдастырылып, медициналық ұйымдардағы тәртіп пен қауіпсіздікті сақтау мақсатында Шымкент қаласы Полиция департаментіне ресми хат жолданды.
Бұл бастама аясында медициналық мекемелердегі бейнебақылау жүйелері де жаңартылып, ішкі қауіпсіздікке жауапты қызметкерлердің жұмысы күшейтілуде. Сонымен қатар, медициналық персоналға төтенше жағдайларда өзін-өзі қорғау және құқық қорғау органдарымен байланыс орнату бойынша нұсқаулықтар мен оқыту семинарлары өткізілуде.
Қала билігінің пікірінше, аталған шаралар дәрігерлер мен пациенттердің арасында сенімді қарым-қатынасты нығайтып, медицина қызметкерлерінің кәсіби қауіпсіздігін қамтамасыз етуге бағытталған маңызды бастама болып табылады.
Болашақта мұндай полиция бекеттерін басқа да емдеу мекемелерінде кезең-кезеңімен енгізу жоспарлануда. Бұл қадам Шымкент қаласындағы медициналық мекемелердің жалпы қауіпсіздік деңгейін арттырып, медицина қызметкерлерінің құқығы мен абыройын қорғауға айтарлықтай үлес қоспақ.
Пікір қалдыру