2025 жылғы 28 тамыз күні Шымкент қаласындағы Достық үйінде Қазақстан Республикасы Конституциясының 30 жылдығына арналған «Айбары мықты – Ата Заң» атты дөңгелек үстел отырысы өтті. Маңызды қоғамдық-танымдық шараны ұйымдастырудағы мақсат – Ата Заңның ел дамуына қосқан тарихи үлесін бағалау, оның қоғамдағы рөлін жан-жақты талқылау және жас ұрпақтың құқықтық сауаттылығын арттыру.
Іс-шараға Шымкент қаласы ішкі саясат және жастар істері жөніндегі басқармасының басшылығы, қалалық этномәдени бірлестіктердің төрағалары, Қазақстан халқы Ассамблеясы жанындағы қоғамдық құрылымдардың мүшелері, этносаралық қатынастар саласындағы беделді қоғам қайраткерлері, жергілікті БАҚ өкілдері мен блогерлер клубының белсенді мүшелері қатысты. Қатысушылар қатарында ғылым, білім, заң және саясат саласының сарапшылары да болды.
Дөңгелек үстел барысында Қазақстан Республикасы Конституциясының тарихи негіздері, құқықтық және саяси мәні кеңінен қарастырылды. Қатысушылар Конституцияның Қазақстанды тәуелсіз, демократиялық, зайырлы және құқықтық мемлекет ретінде қалыптастырудағы орны мен маңызын ерекше атап өтті.
М.Әуезов атындағы Оңтүстік Қазақстан университетінің «Саясаттану» кафедрасының меңгерушісі, қалалық Ассамблея жанындағы ғылыми-сарапшылық топтың мүшесі Сәкен Аралбайұлы өз баяндамасында Ата Заңның елдің мемлекеттік негіздерін нығайтудағы тарихи миссиясына тоқталды. Ол Конституцияның нормалары тек құқықтық жүйені ғана емес, сонымен қатар азаматтардың еркіндігі мен теңдігін қамтамасыз ететін негізгі құжат екенін баса айтты.
Заң ғылымдарының кандидаты, доцент, Ж.Тәшенев атындағы университеттің құқық және бизнес кафедрасының меңгерушісі Нұрлан Бижан өз сөзінде Конституцияның құқықтық мемлекетті қалыптастырудағы рөлін тереңірек саралады. Ол елімізде жүзеге асырылып жатқан реформалар мен заңнамалық өзгерістердің барлығы Ата Заң аясында жүзеге асатынын атап өтті. Сондай-ақ, заң ғылымының өкілі ретінде Конституция нормаларының күнделікті өмірде нақты жүзеге асуы – азаматтардың құқықтық сауаттылығы мен қоғамның белсенділігіне тікелей байланысты екенін тілге тиек етті.
Кездесу барысында Қазақстан халқы Ассамблеясының елдегі этносаралық татулық пен бірлікті сақтаудағы маңызды рөлі де кеңінен сөз болды. Бүгінде Ассамблея тек келісім мен тұрақтылықтың тірегі ғана емес, сонымен қатар заң шығару процесінің белсенді қатысушысына айналды.
Мемлекет және қоғам қайраткері Орынбай Рахманбердиев осы тұрғыда ерекше пікір білдірді:
— «Бүгінгі таңда Қазақстан – Парламентте этнос өкілдерінен сайланған депутаттардың заң шығару ісіне ресми түрде қатысуы қамтамасыз етілген әлемдегі жалғыз мемлекет. Бұл – Қазақстан халқы Ассамблеясының бірегей конституциялық мәртебесін айқындайтын маңызды көрсеткіш. Бұл институттың саяси салмағы мен құқықтық ықпалы уақыт өткен сайын артып келеді», – деді ол.
Іс-шара барысында қатысушылар Конституцияның азаматтық қоғамды қалыптастырудағы, адам құқықтары мен бостандықтарын қорғаудағы рөліне ерекше назар аударды. Конституцияның әрбір азаматы үшін кепіл болатын нормалары ел ішінде тұрақтылық пен әділеттілікке негізделген басқару жүйесін қамтамасыз етіп келеді.
Дөңгелек үстелге қатысқан БАҚ өкілдері мен блогерлер өз платформаларында Ата Заң туралы білім мен түсінікті кеңінен тарату қажеттігін атап өтті. Бұл – әсіресе жастар арасында құқықтық мәдениетті қалыптастыру мен заңға деген құрметті арттырудың тиімді жолы.
Іс-шара барысында ел ішіндегі бірлік пен ынтымақтың негізі – Конституция екені туралы ортақ пікір айтылды. Этностар арасындағы достық пен келісімнің Қазақстанда тұрақты сипат алуы – Ата Заң аясында жүргізіліп отырған салиқалы саясаттың нәтижесі.
Қалалық этномәдени бірлестік өкілдері бұл басқосу ел Конституциясының 30 жылдық мерейтойына арналуымен қатар, оның мазмұнын тереңірек түсінуге үлкен мүмкіндік бергенін жеткізді.
Шымкентте өткен «Айбары мықты – Ата Заң» атты дөңгелек үстел Қазақстан Республикасы Конституциясының 30 жылдық мерейтойы аясында ұйымдастырылған тағылымды әрі мазмұнды шара ретінде ел тарихында өз орнын алады. Конституция – ел тұрақтылығының негізі, азаматтар құқығының кепілі және мемлекетіміздің даму жолындағы басты бағдаршамы.
Бүгінгі таңда еліміз Ата Заңның қағидаттарына сүйене отырып, жаңа белестерге ұмтылуда. Осындай қоғамдық-танымдық шаралар арқылы азаматтардың құқықтық мәдениетін арттыру мен ел болашағына деген сенімді нығайту жұмыстары жалғасатын болады.
Пікір қалдыру