Түркістан облысы Қазақстан халқы Ассамблеясының жастары ҚХА-ның 30 жылдығына орай облыстың киелі жерлерін қамтитын «Тарихи таным» атты танымдық экспедициясын бастады. Экспедицияның негізгі мақсаты – жастардың тарихи санасын тереңдету, отансүйгіштік рухын күшейту және ел бірлігін нығайту. Бұл бастама рухани мұраға тағзым етуді, өткен мен бүгіннің сабақтастығын сезінуді көздейді.
Экспедиция «Достық үйі» ғимаратының алдынан бастау алды. Ашылу салтанатына Түркістан облыстық қоғамдық даму басқармасы басшысының орынбасары – Ассамблея хатшылығының меңгерушісі Нұрсұлтан Сейтжанов, «Қоғамдық келісім» КММ-нің басшысы Эльмира Жанғазиева, сондай-ақ Ассамблея жастары мен оның мүшелері қатысты. Салтанатты шарада сөз сөйлеген Нұрсұлтан Сейтжанов бұл сапардың маңызын ерекше атап өтті. Оның айтуынша, киелі жерлерге жасалатын мұндай рухани саяхаттар жас ұрпақтың ел тарихына деген құрметін арттырып, ұлттық бірегейлікті қалыптастыруға ықпал етеді. «Киелі жерлер – біздің рухани құндылықтарымыздың алтын діңгегі, өткеніміздің куәсі. Сол мекендерге бару – ата-баба мұрасына тағзым ету, тарихпен тілдесу», – деді ол. Сондай-ақ бірлік пен татулықтың қоғамдағы басты байлық екенін айтып, экспедицияның осы құндылықтарды дәріптейтінін жеткізді.
Ашылу салтанатынан кейін жастар Отырар мен Сауран аудандарындағы тарихи әрі киелі орындарға жол тартты. Бұл өңірлер – қазақ өркениетінің алтын бесігі, Ұлы Жібек жолы бойындағы ірі мәдени орталықтар. Отырар – әл-Фараби туған, ғылым мен мәдениет дамыған мекен болса, Сауран – қорғаныс жүйесімен ерекшеленетін, тарихтың талай кезеңіне куә болған қала. Осы жерлерді көзбен көріп, тарихымен танысу жастарға оқулықтан тыс, тірі тарихты сезінуге мүмкіндік береді.
Мұндай экспедициялар жастарға бірнеше маңызды үлгі береді. Ең алдымен, ол туған жерге деген сүйіспеншілікті арттырып, отансүйгіштік сезімді нығайтады. Екіншіден, тарихи жады қалыптасып, ұлттық құндылықтарды құрметтеу мәдениеті дамиды. Үшіншіден, түрлі этнос өкілдерінен құралған Ассамблея жастарының бірлескен сапары достық пен өзара түсіністікті күшейтеді. Бұл – Қазақстан халқы Ассамблеясының басты қағидаттары саналатын бірлік пен келісімнің нақты көрінісі.
Қоғам үшін де мұндай бастамалардың пайдасы зор. Тарихын таныған, рухани құндылықтарды бойына сіңірген жас буын – елдің ертеңі. Олар қоғамда жауапкершілікті сезініп, бейбітшілік пен татулықты сақтауға үлес қосады. «Тарихи таным» экспедициясы – жастарды рухани тұрғыдан тәрбиелейтін, елдік сана мен азаматтық ұстанымды қалыптастыратын маңызды жоба. Осындай игі бастамалар арқылы Түркістан өңірінде отансүйгіш, саналы әрі бірлігі бекем ұрпақ тәрбиеленетініне сенім мол.
Пікір қалдыру