Ордабасы аудандық полиция бөлімінің бастамасымен «Жас сақшы» полиция сыныбының оқушыларына арналған тағылымға толы экскурсия өтті. Іс-шараның басты мақсаты – жас ұрпақты патриотизмге баулу, олардың құқық қорғау саласына деген қызығушылығын ояту және құқықтық сана-сезімін қалыптастыру.
Экскурсия барысында оқушылар алдымен Ордабасы аудандық полиция бөлімінің жұмысымен танысты. Тәртіп сақшылары жас қонақтарға полиция қызметінің ерекшеліктері, бөлім құрылымы, қылмыстың алдын алу бағытындағы жұмыстар, тергеу және жедел іздестіру шаралары туралы жан-жақты түсіндіріп берді. Сонымен қатар, арнайы қызметтік құрал-жабдықтар, формалық киім үлгілері мен полицияның күнделікті атқаратын қызметіне қатысты мағлұматтар оқушылар үшін үлкен қызығушылық тудырды.
Сапардың келесі бөлігі аудандық тарих-өлкетану музейінде жалғасты. Мұнда оқушылар өз туған өлкесінің бай тарихымен, елге еңбегі сіңген тұлғалармен және ежелгі мәдениет жәдігерлерімен танысты. Бұл олардың туған жерге деген сүйіспеншілігін арттырып, рухани дүниетанымын кеңейтуге сеп болды.
Шара барысында оқушылар полицейлерге көкейлерінде жүрген түрлі сұрақтарын қойып, нақты әрі пайдалы жауаптар алды. Көптеген жасөспірімдер полиция қызметіне қызығушылық танытып, болашақта осы салада жұмыс істеуді армандайтындарын айтты. Мұндай кездесулер олардың армандарын айқындап, мақсаттарын нақтылауға үлкен серпін береді.
Жастар арасында құқық қорғау қызметіне деген қызығушылықтың артуы – еліміздің құқықтық мәдениетінің деңгейі өсіп келе жатқанын білдіреді. Бүгінде көптеген мектептерде «Жас сақшы» секілді арнайы полиция сыныптарының ашылуы – осы бағыттағы игі қадамдардың бірі. Бұл сыныптарда оқушылар құқық негіздерімен танысып қана қоймай, қоғамдық тәртіп пен заң талаптарына деген жауапкершілікті ерте жастан бойына сіңіреді.
Осындай тәрбиелік мәні зор экскурсиялар жас буын өкілдерін қоғамдағы тәртіп пен қауіпсіздікті қамтамасыз ететін полиция қызметінің маңызымен терең таныстырады. Сонымен қатар, отансүйгіштікке, әділдікке және жауапкершілікке баулып, олардың азаматтық ұстанымының қалыптасуына ықпал етеді.
Ордабасы аудандық полиция бөлімінің ұйымдастыруымен өткізілген бұл тағылымды іс-шара жас ұрпақтың заңға, тәртіпке деген оң көзқарасын нығайтып, болашақта білікті құқық қорғаушы болуға ұмтылатын жастардың қатарын арттыруға үлкен үлес қосары сөзсіз.
Полиция – тек тәртіп сақшысы ғана емес, қоғамның қауіпсіздігі мен тұрақтылығын қамтамасыз ететін маңызды құрылым. Сондықтан болашақ полицейлердің бүгіннен бастап осы мамандықтың мәнін түсінуі – ел болашағы үшін маңызды қадам.
Пікір қалдыру