Биыл көктем мезгілі Созақ ауданының шаруалары үшін оңай болған жоқ. Ауа райының құбылмалы, жауын-шашынды және желді күндері дала жұмыстарын жүргізуге едәуір кедергі келтірді. Соған қарамастан, аудан диқандары тынымсыз еңбек етіп, көктемгі егіс науқанын уақытылы әрі сапалы аяқтады. Егіс алқаптарында жұмыстар жүйелі ұйымдастырылып, белгіленген жоспар толық орындалды. Бұл – аудан шаруаларының жоғары еңбек мәдениетінің және ауыл шаруашылығын дамытудағы жаңа тәсілдердің нақты көрінісі.
Көктемгі дала жұмыстарының қарқыны жоғары деңгейде жүргізілуіне аудан әкімдігі мен ауыл шаруашылығы бөлімі ерекше назар аударды. Аудан әкімі Мұхит Тұрысбеков егіс маусымы кезінде бірнеше елді мекендерді аралап, шаруалардың жұмыс барысымен танысты. Әсіресе, Жон бойындағы ірі егіс алқаптарына арнайы барып, егін егудің сапасы мен суару жүйесінің тиімділігіне баға берді. Кездесулер барысында әкім ауыл еңбеккерлерімен және ауыл ақсақалдарымен ашық пікір алмасып, жерді тиімді пайдалану, өнімділікті арттыру және агротехникалық талаптарды қатаң сақтау мәселелерін талқылады.
Мұхит Тұрысбеков атап өткендей, бүгінгі таңда басты мақсат тек егін егу емес, сонымен қатар ауыл шаруашылығына ғылыми негізделген әдістер мен заманауи технологияларды енгізу болып табылады. Ол бұл бағытта аудан шаруаларына цифрлық технологияларды, тамшылатып суару жүйесін және топырақтың құнарлылығын арттыратын агрохимиялық талдауларды кеңінен қолдануды ұсынды.
Көктемгі дала науқаны кезінде бірқатар шаруашылықтар жоғары ұйымдастырушылық қабілет танытты. Мысалы, «Бабата-1» жауапкершілігі шектеулі серіктестігі 100 гектар алқапқа бидай және 50 гектарға жоңышқа егіп, қажетті агротехникалық шараларды уақтылы орындады. Ал «Камила» РБР ЖШС 240 гектар жерге арпа және 50 гектарға жоңышқа дақылдарын септі. Бұл жұмыстардың барлығы жоспарға сәйкес жүйелі түрде жүргізіліп, егілген алқаптар дер кезінде суарылып, тыңайтқыштар енгізілді.
Жалпы аудан бойынша көктемгі егістік көлемі 7371 гектарды құрады. Оның ішінде:
-
370 гектарға – бидай,
-
1438 гектарға – арпа,
-
1100 гектарға – мақсары,
-
760 гектарға – жүгері,
-
508 гектарға – картоп,
-
503 гектарға – көкөніс,
-
502 гектарға – бақша дақылдары,
-
2190 гектарға – жоңышқа егілді.
Бұл көрсеткіштер ауданның ауыл шаруашылығындағы өндіріс әлеуетінің жыл сайын артып келе жатқанын дәлелдейді. Жергілікті шаруалар жерді тиімді игеру арқылы өнім көлемін ұлғайтып қана қоймай, аудан экономикасының дамуына да айтарлықтай үлес қосуда.
Созақ ауданы үшін су мәселесі — ең өзекті бағыттардың бірі. Өйткені егістік жерлердің басым бөлігі суармалы алқаптарға жатады. Осыған байланысты аудан әкімдігі мен су шаруашылығы саласының мамандары тығыз байланыста жұмыс істеп, су көздерін тиімді пайдалану, каналдарды тазалау және су таратудың әділ жүйесін ұйымдастыру бағытында нақты шаралар қабылдады. Нәтижесінде көктемгі егіс кезінде судың жетіспеушілігі байқалған жоқ.
Сонымен қатар, фермерлерге мемлекет тарапынан жан-жақты қолдау көрсетілді. Атап айтқанда, шаруалар тұқым, жанар-жағармай және тыңайтқыш сатып алу кезінде жеңілдетілген несие мен субсидия түріндегі көмектерге ие болды. Бұл – ауыл еңбеккерлерінің жұмысын жеңілдетіп, шығын көлемін азайтуға мүмкіндік берді.
Аудан басшылығының айтуынша, көктемгі егіс жұмыстарының табысты аяқталуы – бүкіл аудан экономикасы үшін үлкен жетістік. Өйткені егістік алқаптарының толық игерілуі мен жердің тиімді пайдаланылуы аудан халқының азық-түлік қауіпсіздігін қамтамасыз етеді, сонымен қатар жергілікті бюджет кірісін арттырады.
Ендігі міндет – жазғы маусымда егілген дақылдарды күтіп-баптау, суару, зиянкестерден қорғау және күзгі орақ науқанына тыңғылықты дайындық жүргізу. Созақтық диқандардың қажырлы еңбегі мен жерге деген сүйіспеншілігі алдағы уақытта да мол өнім мен берекелі күздің кепілі болмақ.
Созақ ауданының егіншілері мен шаруалары бүгінде еңбекқорлық пен бірліктің үлгісін көрсетіп отыр. Табиғаттың тосын мінезіне қарамастан, олар өз кәсібіне адалдық танытып, туған жердің өркендеуіне үлес қосуда. Бұл игі істердің нәтижесінде ауданның ауыл шаруашылығы саласы жаңа белестерге көтеріледі деген сенім зор.
Пікір қалдыру