Қазіргі таңда интернеттің күнделікті өмірге дендеп енуімен бірге, ғаламтор кеңістігінде жасалатын қылмыстар, әсіресе интернет-алаяқтық оқиғаларының саны артып келеді. Алаяқтар түрлі әдіс-тәсілдерді қолдана отырып, адамдардың жеке деректерін иемденіп, материалдық шығын келтіріп қана қоймай, қоғамда сенімсіздік пен үрей тудыруда. Осы орайда Түркістан облысы Полиция департаменті интернет-алаяқтықпен күресті күшейту мақсатында ауқымды ақпараттық-түсіндіру жұмыстарын жүргізуде.
Түркістан облысы Полиция департаменті бастығының тікелей тапсырмасымен Киберқылмысқа қарсы іс-қимыл басқармасының мамандары Арыс аудандық полиция бөлімімен бірлесіп, жергілікті тұрғындар арасында кең көлемде ақпараттық науқан ұйымдастырды. Бұл бастаманың басты мақсаты – халықты интернет-алаяқтардан қорғанудың қарапайым жолдарымен таныстыру, құқықтық сауаттылықты арттыру және алаяқтық қылмыстардың алдын алу.
Түсіндіру жұмыстары шеңберінде полицейлер қоғамдық орындарда, базарларда, көше бойларында және халық көп жиналатын жерлерде 1000-нан астам ақпараттық жадынама таратты. Аталған жадынамаларда интернет арқылы жасалатын алаяқтықтың кең таралған түрлері, олардан қорғану жолдары, алаяқтарды тану тәсілдері және күдік тудыратын жағдайларда қандай әрекеттер жасау керектігі нақты әрі қарапайым тілмен жазылған.
Полицейлер тек ақпараттық қағаздар таратумен шектелмей, жергілікті тұрғындармен тікелей кездесіп, түсіндіру жұмыстарын жүргізді. Әңгіме барысында тәртіп сақшылары алаяқтықтың кең таралған түрлеріне тоқталып, мысалдар келтірді. Мәселен, жалған интернет-дүкендер, өздерін банк қызметкері ретінде таныстыратын қаскөйлер, «жеңіп алдыңыз» деген сылтаумен жеке деректерді сұрататын хабарламалар – бұлардың барлығы алаяқтардың жиі қолданатын тәсілдері екені айтылды.
Түркістан облысының полицейлері мұндай шаралар тек бір реттік акция емес, керісінше, халық арасында құқықтық мәдениетті қалыптастырудың ұзақмерзімді стратегиясының бір бөлігі екенін атап өтті. Азаматтардың цифрлық сауаттылығы артқан сайын, алаяқтарға алдану жағдайлары да азаятыны белгілі.
«Қоғам мүшелері интернет желісін пайдалану барысында абай болып, кез келген күдікті сілтемелерге өтпеуі, бейтаныс адамдарға жеке деректерін бермеуі тиіс. Біздің міндетіміз – тұрғындарды осындай қауіптерден алдын ала сақтандыру, қылмыстың алдын алу,» – дейді Киберқылмысқа қарсы іс-қимыл басқармасының қызметкерлері.
Интернет-алаяқтықтың алдын алу – тек құқық қорғау органдарының ғана емес, бүкіл қоғамның ортақ міндеті. Әрбір азамат өзінің қауіпсіздігіне жауапкершілікпен қарап, ақпараттық қауіптерге дайын болуы қажет. Мұндай түсіндіру шаралары халықтың санасын көтеріп, қауіпсіз цифрлық қоғам құруға бағытталған нақты қадамдардың бірі болып отыр.
Пікір қалдыру