Шымкент: Шомылу маусымына орай қауіпсіздік шаралары түсіндірілді

Шымкент қаласы Қаратау ауданы аумағындағы елдімекендердің тұрғындарына шомылу маусымында басты қаперге ұстар қауіпсіздік шаралары түсіндірілді. Жыл сайын шомылу маусымы кезінде талай адам суға кетіп, аяқ астынан қайғылы жағдай орын алып жатады. Осындай оқиғалардың алдын алу мақсатында Қаратау ауданы әкімдігі мен аудандық төтенше жағдай бөлімі және жергілікті полиция өкілдері бірлесіп, шомылу маусымындағы қауіпсіздікті сақтау шаралары бойынша түсіндірме жұмыстарын жүргізді. Ең алдымен құзырлы мекемелердің мамандарынан құрылған топ алдымен Қайнарбұлақ тұрғын алабындағы көл маңында орналасқан тұрғын үйлерге арнайы түсіндірме жұмыстарын жүргізіп, үгіт-насихат қағаздарын таратты. Айта кету керек, тек ересектер мен балалар да рұқсат етілген аймақтарда ғана шомылу керек. Мамандар әсіресе, жас балалардың ата-ана қадағалауынсыз ағын суға шомылуға болмайтынын айтып ескертіп жүр. Құзырлы мекемелердің қызметкерлерінен құрылған топ шомылу маусымы кезінде ата-аналарды сақ болуға шақырады. Су көздеріне барғанда балаларға бас-көз болуды, барынша қадағалау қажеттігін айтты.