Түркістан облыстық Төтенше жағдайлар департаментінің Мемлекеттік өрт бақылау басқармасы 2024-2025 жылдардағы жылыту маусымының жоспарын бекітіп, соның аясында жыл сайын өткізілетін «Өрт қауіпсіздігі айлығы» іс-шарасын ойдағыдай аяқтады. Аталмыш шара 15 тамыз бен 15 қыркүйек аралығында ұйымдастырылды. Негізгі мақсат — жылыту маусымы басталмас бұрын тұрғындардың қауіпсіздік талаптарын сақтау, өрттен және улы газдан улану жағдайларының алдын алу, адам өмірі мен денсаулығын қорғау, мүлік пен қоршаған ортаны өрт қауіптілігінен сақтау. Бұл жөнінде департаменттің басқарма басшысы Мұхан Байымбетов жергілікті БАҚ өкілдерімен өткен брифинг барысында жан-жақты мағлұмат берді.
Шара барысында төтенше жағдай мамандары халықтың арасында ақпараттық-түсіндіру жұмыстарын жүргізіп, өрт қауіпсіздігінің негізгі қағидаларын түсіндірді. Әсіресе әлеуметтік жағдайы төмен, осал топтардың үй-жайларына ерекше көңіл бөлінді. Осы санаттағы отбасылардың тұрғылықты жерлерінде өрт қауіпсіздігін арттыру мақсатында 200 дана газосигнализатор құрылғысы орнатылды. Бұл құрылғылар улы газдың шектік концентрациясы артқан кезде дабыл беріп, тұрғындарды дер кезінде сақтандырады. Нәтижесінде биылғы жылыту маусымының алғашқы кезеңінде (қыркүйектен бастап) аймақта улы газдан улану оқиғалары тіркелмеген. Бұл — алдыңғы жылдармен салыстырғанда қауіпсіздік деңгейінің жақсарғанын көрсететін оң жетістік.
Дегенмен, өткен жылыту маусымындағы жағдай да ескерусіз қалмады. Өткен кезеңде облыс аумағында улы газбен уланудың 7 оқиғасы тіркеліп, өкінішке қарай, 5 адамның өмірін қиған болатын. Осы ащы тәжірибені ескере отырып, биыл жергілікті атқарушы органдар мен төтенше жағдай қызметі алдын алу шараларын күшейтті. Газосигнализатор құрылғыларының орнатылуы — осындай әрекеттердің нақты нәтижесі. Сонымен қатар мамандар үйлерге кіріп, тұрғындармен бетпе-бет әңгімелесу арқылы қауіпсіздік ережелерін түсіндірді, жылыту жүйелерін қалай дұрыс пайдалануға болатыны туралы кеңестер берді.
Бұған қоса, жылыту маусымы басталғалы бері тұрғын үйлерде өрт оқиғалары да назарға алынды. Төтенше жағдайлар департаментінің деректеріне сәйкес, 2024-2025 жылдардағы жылыту маусымының алғашқы кезеңінде жалпы саны 20 өрт оқиғасы тіркелген. Бұл жағдайлар негізінен отты абайсыз пайдалану, жылу пештерінің немесе электр қондырғыларының дұрыс жұмыс істемеуі, қауіпсіздік талаптарының сақталмауы салдарынан туындады. Өрт оқиғаларының салдарынан 2 адам жарақат алды, бірақ қаза тапқандар тіркелмегені көңілге медеу. Бұл да болса, алдын алу жұмыстарының белгілі бір дәрежеде өз жемісін бергенінің айғағы.
Алдағы кезеңде де төтенше жағдайлар қызметі профилактикалық іс-шараларға басымдық беріп, тұрғындардың қауіпсіздігін қамтамасыз етуді бірінші орынға қоятынын мәлімдеді. Осы мақсатта облыс бойынша тұрақты түрде түсіндіру жұмыстары жалғаса береді. Қала мен ауылда тұратын азаматтарға жылыту құралдарын, пештерді және газ қондырғыларын дұрыс орнату, оларды уақтылы тексеру, түтін мұржаларын тазартып отыру, электр сымдарын, жылытқыш құрылғыларды қауіпсіздік шараларын сақтай отырып пайдалану жөнінде нұсқаулар беріледі.
Атқарылып жатқан жұмыстар мен бекітілген жоспардың арқасында Түркістан облысында жылыту маусымы бұрынғыға қарағанда біршама қауіпсіз өтуге үміт бар. Жергілікті тұрғындардың өрт қауіпсіздігіне байланысты білімін арттыру, алдын алу шараларының жүйелі жүргізілуі және жауапты органдардың үйлесімді әрекеттері осы саладағы келеңсіз жағдайларды барынша азайтуға сеп болмақ.
Пікір қалдыру