Түркістан өңірінде құрылыс қарқыны бәсеңдеген емес. Әсіресе, облыс орталығында жұмыс қарқынды жүріп жатыр. Халық санының өсуіне байланысты және қаланы туристік орталыққа айналдыру бағытында тағы да маңызды жобалар жүзеге асырылуда. Аталған жобалар облыс әкімдігінде өткен кезекті мәжілісте жан-жақты талқыланды.
Түркістан облысының әкімі Дархан Сатыбалды қаланы Бас жоспарға сай дамытып, бірыңғай сәулет үлгісін қолдану керектігін ерекше атап өтті. Ол көгалдандыру жұмыстарын күшейту, ағаштарды көбейту және бос жатқан жерлерді тиімді әрі сапалы игеруді тапсырды. Әкімнің айтуынша, табиғи ландшафтты сақтау мен жаңғырту өңірдің экологиялық жағдайын жақсартып, тұрғындардың өмір сүру сапасын арттырады.
– Түркістанның өзіндік дизайны, сәулет үлгісі болуы керек екенін білесіздер. Әр жобаны жіті зерделеп, сәулетшілердің талқысыннан кейін ғана жүзеге асыру керек. Әлеуметтік нысандар, демалыс орындары, саябақтар және өзге де ғимараттар бір-бірімен үйлесіп тұрғаны жөн, – деді Дархан Сатыбалды.
Өңірдің сәулеті талқыланған жиналыста 17 жоба қаралды. Қалалық мәдениет үйінің қасбеті, қалаға кіреберіс тұстағы тұрғын үйлер, абаттандыру жобалары да сараланды. Сонымен бірге ескек есу каналының маңын ірі туристік орталыққа айналдыру, аквапарк, қонақ үйлер салу мәселесі де жан-жақты талқыға түсті. ІТ парк салу, қосымша білім беру орталықтары ғимараттарын салу туралы да ұсыныстар қаралды.
Жобаларды жүзеге асыруға жеке инвестициялар да тартылмақшы. Өңірдегі кәсіпкерлер мен шетелдік инвесторлардың қызығушылығы артқанын атап өтілді. Әкімшілік тарапынан инвестицияларды тарту үшін арнайы ынталандыру шаралары қарастырылып, бизнестің дамуына қолайлы жағдай жасау көзделуде.
Сонымен қатар, инфрақұрылымдық жобалар да үлкен назарда. Жол-жөндік жұмыстарды жетілдіру, қоғамдық көліктің санын көбейту, санитарлық-гигиеналық жағдайларды жақсарту жоспарланып отыр. Бұл шаралар қаланың өмір сүру ортасын жақсартуға және тұрғындардың күнделікті өмірін жеңілдетуге бағытталған.
Түркістан облысының дамуы барысында экологиялық тұрақтылықты сақтау да басты орын алады. Қаланың жасыл желектерін кеңейту, ағаш отырғызу жұмыстарын көбейту арқылы ауаның сапасын жақсарту көзделуде. Сонымен қатар, су ресурстарын тиімді пайдалану және қалдықтарды экологиялық таза жолдармен өңдеу бойынша да шаралар қабылдануда.
Туристік әлеуетті арттыру мақсатында тарихи мұраларды сақтап, қаланың мәдениетін насихаттау бойынша да бірқатар жобалар қолға алынды. Ескі қала архитектурасын жаңғырту, тарихи ескерткіштерді қалпына келтіру және жаңа мәдени орталықтар ашу арқылы Түркістанды шетелдік туристер үшін тартымды ету жоспарлануда. Бұл шаралар өңір экономикасын дамытып, халықтың табысын арттыруға септігін тигізеді.
Жиналыста қабылданған жобалардың жүзеге асырылуы өңірдің жалпы дамуына елеулі үлес қосады деп сенілуде. Қаланың құрылыс саласы мен инфрақұрылымы бірқалыпты дамып, тұрғындарға ыңғайлы әрі заманауи өмір сүру ортасын қамтамасыз етуге бағытталған. Түркістан облысының басшылығы мен құрылыс саласындағы кәсіпкерлердің бірлескен еңбегі аймақтың жарқын болашағына нық сеніммен қарайды.
Пікір қалдыру