Түркістанда «Ұлттық тәрбие – құндылық негізі» тақырыбында кеңейтілген кеңес өтті. Кеңес барысында қаладағы білім беру мекемелерінде жастар мен жасөспірімдер арасында орын алып жатқан келеңсіз жағдайлардың алдын алу және оларды болдырмау шаралары талқыланды.
Кеңесте қала прокуроры, қалалық полиция басқармасының өкілдері, қалалық емхананың бас дәрігері, білім ордаларының директорлары және ата-аналар комитетінің мүшелері сөз сөйлеп, өз пікірлерін білдіріп, ұсыныстарын айтты. Баяндамашылар жасөспірімдер арасындағы құқық бұзушылықтың, ерте жүктілік пен өзіне-өзі қол жұмсау фактілерінің алдын алу мәселелеріне тоқталып, болашақ ұрпаққа дұрыс тәрбие берудің маңыздылығын атап өтті. Келесі кеңес отырысында осы бағыттағы жұмыстардың нәтижелері қаралып, жаңа жобалар талқыланбақ.
Қазір қоғамды алаңдатып отырған өзекті мәселе – ұрпақ, яки бала тәрбиесі. Бұған ел ертеңін ойлаған әрбір азамат бейжай қарамайды. Президент Қасым-Жомарт Тоқаев әрдайым ұрпақ тәрбиесіне жауапты болуды жүйелі түрде ескертуде. Мұны Ұлттық құрылтай мінберінен де айтты. Бір сөзінде: «Өскелең ұрпақтың тәрбиесі – өте маңызды мәселе. Ашығын айтсақ, қазір жас ұрпақ әлеуметтік желі арқылы тәрбие алып жатыр. Баланы дұрыс бағытқа бұрып, жол көрсетіп отырмасақ, бұл – өте қауіпті үрдіс», деген-ді.
Шындығында, қазіргі таңда ғаламтор мен әлеуметтік желілер бала санасына түрлі әсер етіп, қате құндылықтарды насихаттайтын жағдайлар көбейген. Мұндай сәтте мектеп, отбасы және жалпы қоғам болып бірлескен іс-әрекет атқару аса қажет. Ұрпақ тәрбиесі тек мұғалімдер мен ата-аналарға ғана жүктелмей, қоғамда белсенділік танытатын әрбір азаматтың міндетіне айналуы тиіс. Түркістан қаласындағы кеңесте талқыланған мәселелер – соның айқын көрінісі.
Сарапшылардың айтуынша, жасөспірімдер арасындағы құқық бұзушылық көбіне әке-шеше назарынан тыс қалған, психологиялық қолдаудан кенде, бос уақытын мәнді пайдалана білмеген оқушылар арасында жиі ұшырасады. Ал ерте жүктілік – жас қыздардың әлеуметтік, психологиялық тұрғыдан дайын еместігімен қатар, ақпараттың теріс бағытта берілуінің салдары. Бұл ретте, дәрігерлер мен психологтардың да айтар уәжі бар. Олар жасөспірімдердің денсаулығына тұрақты түрде мониторинг жүргізіп, олармен жиі сұхбат құру қажет екенін алға тартуда.
Сондай-ақ, кеңесте ата-аналардың жауапкершілігін арттыру мәселесі де қозғалды. Бала тәрбиесі үйден басталатыны белгілі. Отбасында ұлттық құндылықтарға сүйеніп, сыйластық пен адамгершілік қағидаттарын терең сіңіру – өскелең ұрпақтың санасына оң әсер ететін маңызды қадам. Халқымыздың қанында бар ынтымақ, ауызбіршілік, үлкенге құрмет, кішіге ізет көрсету, мейірімділік пен адалдық сынды қасиеттерді жас буынға үйрету арқылы біз қоғамның рухани өркендеуіне жол ашамыз.
Алдағы уақытта бұл бағытта бірнеше жаңа жобаны іске асыру көзделуде. Мәселен, мектептерде ұлттық құндылықтарды дәріптейтін тәрбие сағаттарын көбейту, ата-аналармен тұрақты түрде ашық жиындар өткізу, спорттық-мәдени үйірмелердің жұмысын жетілдіру секілді шаралар қарастырылмақ. Сонымен қатар, құқық қорғау және денсаулық сақтау органдарының өкілдерімен бірлескен түсіндіру жұмыстарын жандандыру қажеттілігі туындап отыр.
Жастарға қолдау көрсету – тек тәртіпке шақыру емес, оларға өмірлік дағдыларды үйрету, өз-өзіне сенімді тұлға болуына көмектесу. Осы орайда, педагогтар балалардың ішкі жан дүниесіне үңіліп, олардың қызығушылықтарын ескерген жағдайда ғана оң нәтижеге қол жеткізуге болатынын атап өтті. Психологтар тарапынан мектеп қабырғасынан бастап жүйелі кеңес беру, жеке тұлғалық қасиеттерді дамыту, стреске төзімділік пен эмоционалды интеллект қалыптастыру – тәрбие үдерісіндегі маңызды қадамдар.
Соңғы сөз – ұрпақ тәрбиесіне бейжай қарамау қажеттілігі жайлы. Мемлекет болашағы – білімді де парасатты жас ұрпақтың қолында. Егер біз әлеуметтік желі мен жаһандану заманында ұлттық құндылықтарды ұмытпай, керісінше, оларды нығайтып, жаңаша тұрғыда дамытуға ден қоя білсек, келер күннің кепілі – ізгілік пен тұғырлы тәрбие болмақ. Осындай кеңестер мен нақты іс-шаралар еліміздің рухани өркендеуіне, келешек буынның кемелденуіне берік негіз қалайтыны даусыз.
Пікір қалдыру