Шымкент қаласында балалар мен бұқаралық спортты дамытуға бағытталған ауқымды жұмыстар жүргізілуде. Мемлекет басшысының тапсырмасы аясында қалада көптеген ашық спорт алаңдары мен балалар ойын алаңшалары салынуда, бұл өз кезегінде тұрғындардың спортпен шұғылдануына, сондай-ақ балалардың қауіпсіз әрі көңілді уақытта өткізуіне мүмкіндік береді.
2024 жылы Тұран ауданында балаларға арналған 40 жоба жоспарланған. Осы жобалар аясында 30 ойын алаңшасы, 8 кешенді алаңша (балалар/спорт) және 2 спорт алаңы салынатын болады. Қазіргі уақытта 20 нысан пайдалануға берілді, ал 2 нысан бойынша құрылыс жұмыстары жалғасуда. Сонымен қатар, демеушілер тарапынан қосымша қолдаулар да көрсетілуде. Түркістан шағын ауданы Айқап көшесіне балалар ойын алаңшасы мен Рысқұлбеков көшесіне тренажерлық алаңша орнатылды. Бұл жобалар тұрғындардың әлеуметтік ахуалын жақсартып, қаладағы өмір сүру сапасын арттыруға септігін тигізеді. Жобалардың көпшілігі халықтың қатысуымен жүзеге асуда, әсіресе, «Халық қатысатын бюджет» жобасы аясында аулалар абаттандырылуда.
Аулаларды жаңарту барысында бұрынғы құрылыс элементтерінің тозығы жеткенін ескере отырып, оларды алмастыру жұмыстары жүргізілді. Аулалардағы ойын элементтерінің басым бөлігі темірден жасалған және көпшілігінің уақыт өте келе тозғаны байқалды. Жаңадан орнатылған элементтер, оның ішінде әткеншектер, тербелмелі ойыншықтар, құмсалғыштар, тербелмелі мотоциклдер мен жылқылар балалар үшін тартымды әрі қауіпсіз жағдай жасауды көздейді. Ойын алаңшаларының едендеріне резеңке жабындар төселіп, балалардың құлап жарақат алуын болдырмау үшін барлық сақтық шаралары қолға алынған. Бұл шаралар балалардың денсаулығына зиян келтірмей, олардың ойынға деген қызығушылығын арттыруға мүмкіндік береді.
Шымкент қаласының көпқабатты тұрғын үйлер аумағында да жаңа ойын алаңшалары орнатылып, тұрғындар үшін қолайлы жағдайлар жасалуда. Ойын алаңшаларының орналасқан жерлері балаларға ыңғайлы әрі қауіпсіз болуын қамтамасыз ететін арнайы жобалар негізінде салынып жатыр. Сондай-ақ, құрылыс материалдары мен жабдықтардың барлығы тек отандық өндірушілерден алынуда, бұл жергілікті экономикаға қосымша қолдау көрсетуге мүмкіндік береді.
Қалада жаңа веложолдың салынуы да маңызды жетістік болып табылады. Балаларды қорғау күніне орай бұрынғы «Тұлпар» балалар темір жолының орнына 5 шақырымға созылған веложол салынды. Бұл веложол тек балалар үшін емес, жалпы қала тұрғындары үшін де үлкен мүмкіндік. Веложолдың бойында арнайы баспалдақтар мен демалыс аймақтары құрылды, бұл адамдардың жайлы жүруі мен демалуы үшін қосымша шарттар туғызды. Сонымен қатар, демеушілердің көмегімен тағы екі демалыс аумағы тұрғындар игілігіне берілді. Желтоқсан көшесі бойында және Мадлен мейрамханасы аумағында орын тепкен бұл аллеялар мен скверлер тұрғындардың демалуына арналған жайлы орындар болып табылады.
Қазіргі таңда Шымкент қаласының инфрақұрылымы тек балаларға ғана емес, ересектерге де қолайлы болып келеді. Қаладағы аулалар мен қоғамдық орындарда ойын алаңшаларының жаңартылуы, спорт алаңдарының құрылуы және веложолдардың пайда болуы — барлығы қала өмірінің сапасын арттырып, тұрғындардың белсенді өмір салтын ұстануына жағдай жасайды.
Пікір қалдыру