Қазақстанда соңғы жылдары ауыл шаруашылығын қолдау мен ауылдағы халықтың тұрмысын жақсартуға бағытталған бірнеше маңызды жобалар жүзеге асырылып келеді. Солардың бірі – 2023 жылдан бастап республика көлемінде іске қосылған «Ауыл аманаты» жобасы. Бұл – ауыл тұрғындарының табысын арттыру, ауыл шаруашылығына және шағын кәсіпкерлікке кең қолдау көрсету, сондай-ақ ауылда кооперативтік өндіріс пен өңдеуді дамытуға арналған кешенді бағдарлама.
«Ауыл аманаты» – бұл жай ғана қаржылық көмек емес. Ол ауылдағы өзін-өзі жұмыспен қамтыған немесе жұмыссыз жүрген азаматтарды нақты кәсіби бағыттарға бейімдеу арқылы тұрақты табыс көзіне ие болуына мүмкіндік береді. Жобаның басты мақсаты – ауыл тұрғындарының өмір сапасын арттыру, табысын көбейту, және өңірлердің экономикалық әлеуетін тиімді пайдалану.
Бағдарлама аясында жеке кәсіп ашқысы келгендерге жылдық 2,5% несие ұсынылады. Несиенің қайтару мерзімі 5–7 жыл аралығында. Мұндай жеңілдетілген шарттар ауыл кәсіпкерлеріне өз ісін бастауға және дамытуға қолайлы жағдай жасайды.
Жоба алғаш Жамбыл облысында пилоттық түрде іске қосылып, оң нәтиже бергеннен кейін, 2023 жылдан бастап барлық өңірлерде кеңінен жүзеге асырыла бастады. Бір жылдың ішінде республика бойынша 8000-нан астам жоба мақұлданып, ауыл тұрғындарына 40 миллиард теңгеден астам несие берілді. Мыңдаған адам өз кәсібін бастап, ауылда жаңа жұмыс орындары ашылып, азық-түлік өндірісі мен ауыл шаруашылығы өнімдерін өңдеу ісі жанданды.
Жобаның арқасында мал шаруашылығы, өсімдік шаруашылығы, жылыжай бизнесі, ауылдық өңдеу кәсіпорындары, кооперативтер белсенді дами бастады. Бұған қоса, үй іргелік жерлерді тиімді пайдалану және аграрлық кооперацияны күшейту – басты назарда.
Түркістан облысы бойынша «Ауыл аманаты» жобасы аясында бөлінген қаражат көлемі 13,2 млрд теңгені құраса, соның бір бөлігі Жетісай ауданына тиесілі. Бүгінгі күнге дейін Жетісай ауданында жоба аясында 176 жоба мақұлданып, 1,3 млрд теңгеге жуық қаражат бөлінген. Оның ішінде 83 жоба мал шаруашылығына, 9 жоба өсімдік шаруашылығына, ал қалғаны жылыжай шаруашылығы мен қайта өңдеуге бағытталған.
Мысалы, Жетісай ауданының Ж.Ералиев ауылдық округінде 71 өтініш түсіп, оның 51-і мақұлданған. Бұл жобалар сүт бағытындағы мал өсіру, үй іргелік жылыжай салу, және сүт өнімдерін өңдеумен айналысатын кооператив құруға бағытталды.
«Ауыл аманаты» – ауыл тұрғындарының экономикалық белсенділігін арттыруға тікелей ықпал етуде. Несие алған әрбір азамат тек өз табысын арттырып қоймай, бірнеше адамды жұмыспен қамтуда. Бұл ауылдағы жұмыссыздықты азайтуға, халықтың мемлекеттік жәрдемақыға тәуелділігін төмендетуге және ауыл шаруашылығы өнімдерінің қолжетімділігін арттыруға себепші болды.
Сонымен қатар, ауыл ішінде кооперативтік қатынастар орнап, өнімді жинау, өңдеу, сату процесі жүйелі түрде қалыптаса бастады. Бұл – ауылдың ұзақ мерзімді экономикалық тұрақтылығы үшін аса маңызды фактор.
«Ауыл аманаты» – ауыл халқының табысын арттырып, оларды нақты кәсіппен айналысуға ынталандыратын тиімді жоба. Жетісай ауданындағы алғашқы нәтижелер осы жобаның ауыл экономикасына нақты пайда әкеліп жатқанын көрсетеді. Келешекте бұл бағдарлама арқылы ауылдық елді мекендерде әл-ауқат артып, тұрақты дамуға қол жеткізу – басты мақсаттардың бірі.
Ең бастысы – бұл жоба ауыл тұрғындарының өз жерінде, өз елінде лайықты өмір сүруіне, еңбек етуіне, кәсібін дамытуына нақты мүмкіндік беріп отыр.
Пікір қалдыру