Түркістан өңірінде кәмелетке толмағандардың қауіпсіздігін қамтамасыз ету, құқықбұзушылықтың, қылмыстың және әлеуметтік қауіптің алдын алу мақсатында «Жасөспірім» атауымен жедел-профилактикалық іс-шара белсенді түрде өткізіліп жатыр. Аталған іс-шара Түркістан облыстық полиция департаментінің бастамасымен жүзеге асып отыр және барлық қала мен аудан аумақтарында қамтылған.
Шара аясында полиция қызметкерлері кешкі және түнгі уақыттарда рейдке шығып, ата-анасының немесе заңды өкілдерінің қарауынсыз жүретін жасөспірімдерді анықтауға бағытталған жұмыстарды жүргізуде. Бұл ретте, түнгі уақытта компьютерлік клубтар, ойын-сауық орындары, саябақтар мен дүкен маңындағы алаңдар ерекше назарға алынуда.
Өткен түні ұйымдастырылған кезекті рейд барысында тәртіп сақшылары Түркістан қаласында орналасқан бірнеше компьютерлік клубты тексеріп шықты. Аталған клубтарда түннің жарымында ойын ойнап отырған 15-ке жуық жасөспірім анықталды. Олардың барлығы да ата-анасының немесе заңды өкілінің ертіп жүруінсіз қоғамдық орында жүрген. Мұндай жағдай балалардың қауіпсіздігіне тікелей қатер төндіретіні айтпаса да түсінікті.
ҚР «Кәмелетке толмағандар арасындағы құқықбұзушылықтың алдын алу туралы» заңына сәйкес, 18 жасқа толмаған балалардың түнгі сағат 22:00-ден кейін заңды өкілінсіз қоғамдық орындарда жүруіне рұқсат етілмейді. Бұл талапты бұзған жағдайда баланың ата-анасы немесе қамқоршысы ҚР Әкімшілік құқықбұзушылық туралы кодексінің тиісті бабы бойынша әкімшілік жауапкершілікке тартылады. Сонымен бірге, кәмелетке толмағандарды беймезгіл уақытта қабылдаған компьютерлік клуб иелеріне де айыппұл салынады немесе лицензиялық талаптарды бұзғаны үшін шара қолданылады.
Рейд кезінде анықталған жасөспірімдермен профилактикалық әңгіме жүргізілді. Олардың ата-аналары шақыртылып, түсіндіру жұмыстары жүргізілді. Полиция өкілдері ата-аналарды өз балаларының жүріс-тұрысын, қайда және кіммен жүргенін мұқият қадағалауға шақыруда. Себебі баланың тәрбиесі мен қауіпсіздігі ең алдымен отбасының жауапкершілігіне жатады.
Сонымен қатар, Түркістан облысының полиция департаменті өңірдегі барлық мектептермен, колледждермен және жергілікті атқарушы органдармен бірлесіп, оқушылар арасында құқықтық сауаттылықты арттыру, бос уақытты тиімді өткізу және зиянды әдеттерден аулақ болуға бағытталған түрлі іс-шаралар ұйымдастыруда. Олардың қатарында спорттық жарыстар, шығармашылық үйірмелер, патриоттық клубтар және еріктілер қозғалыстары бар.
«Жасөспірім» профилактикалық шарасы шеңберінде алдағы күндері тағы да бірқатар түнгі рейдтер жоспарланып отыр. Бұл рейдтер тек қалаларда ғана емес, ауыл-аймақтарды да қамтитын болады. Тәртіп сақшылары балалар мен жасөспірімдердің құқықтарын қорғау және олардың қауіпсіз ортасында өсіп-жетілуіне жағдай жасау мақсатында осындай жұмыстарды жүйелі түрде жалғастырады.
Пікір қалдыру