Шымкент қаласы полиция департаментінің Әл-Фараби ауданы полиция басқармасы жергілікті полиция қызметі бөлімінің тұрмыстық зорлық-зомбылыққа қарсы күрес тобы инспекторлары мен Жастар ресурстық орталығының мамандары бірлесіп, тұрғындар арасында кең ауқымды профилактикалық іс-шара өткізді. Акцияның басты мақсаты – қоғамда тұрмыстық зорлық-зомбылыққа қарсы иммунитет қалыптастыру, халықтың құқықтық сауаттылығын арттыру және құқық қорғау органдарының алдын алу жұмысын күшейту.
Кездесу барысында мамандар азаматтарға тұрмыстық зорлық-зомбылықтың анықтамасы мен оның негізгі түрлерін түсіндірді. Әсіресе физикалық, психологиялық, экономикалық және жыныстық қысымның қандай салдары болатыны нақты мысалдар арқылы жеткізілді. Қатысушыларға заңнамада көзделген құқықтар мен міндеттер түсіндіріліп, қандай жағдайда қай мекемеге жүгінуге болатыны жөнінде толық ақпарат берілді.
Шара аясында ақпараттық брошюралар таратылып, онда сенім телефондары, дағдарыс орталықтарының мекенжайлары мен жергілікті полиция қызметкерлерінің байланыс деректері көрсетілді. Бұл материалдар азаматтарға қажет жағдайда дер кезінде көмек сұрауға мүмкіндік береді.
Инспекторлар тұрмыстық зорлық-зомбылық жасаған адамдарға қатысты құқық қорғау органдарының әрекеттеріне де тоқталды. Алғаш рет анықталған жағдайда құқық бұзушыға ресми ескерту беріледі немесе қорғаныс нұсқамасы жазылады. Егер заң бұзушылық қайталанса, ол адам әкімшілік жауапкершілікке тартылады, ал ауыр жағдайларда қылмыстық іс қозғалады.
Сонымен қатар тұрмыстық зорлық-зомбылық фактілерімен жұмыс барысында учаскелік инспекторлар мен әлеуметтік қызметкерлер тығыз байланыста әрекет ететіні айтылды. Бұл өз кезегінде жәбірленушілерге құқықтық және психологиялық көмек көрсетіп, олардың қауіпсіздігін қамтамасыз етуге мүмкіндік береді.
Жастар ресурстық орталығының мамандары жастар арасында отбасы құндылықтарын насихаттаудың маңыздылығын атап өтті. Олар жас буынға өзара сыйластық, түсіністік пен жауапкершілік секілді қағидаттарды қалыптастыру арқылы тұрмыстық зорлық-зомбылықтың алдын алуға болатынын жеткізді.
Шара соңында полиция басқармасы өкілдері мұндай түсіндірме жұмыстарын жүйелі түрде жалғастыратынын хабарлады. Олар тұрмыстық зорлық-зомбылық – тек құқық қорғау органдарының емес, бүкіл қоғамның ортақ проблемасы екенін еске салып, әрбір азаматтың мұндай оқиғаларға бейжай қарамауға шақырды.
Пікір қалдыру