Білім күні Шымкент қаласында жастар тәрбиесіне бағытталған айтулы оқиға болды. Ахмет Байтұрсынов атындағы мектепте жаңа «Жас сақшы» мамандандырылған сыныптың салтанатты ашылуы өтті. Бұл бастама құқықтық мәдениетті нығайтуға және жас буынды патриотизм рухында тәрбиелеуге бағытталған. Ерекше атап өтер жайт – жаңа кадет сыныбы қызмет бабында ерлікпен қаза тапқан полиция қызметкері, елге адалдығымен есте қалған Нұржан Алтынбековтің есімімен аталды. Оның ерлігі мен қызметке берілгендігі жас сақшыларға өнеге болары сөзсіз.
Іс-шараға Шымкент қаласы Полиция департаменті бастығының орынбасары, полиция полковнигі Маулен Ахметов арнайы қатысып, құттықтау сөз сөйледі. Ол өз сөзінде «Жас сақшы» жобасының жастарға берер тәрбиелік мәніне тоқталып, мұндай сыныптардың жасөспірімдердің бойына тәртіп пен жауапкершілікті қалыптастырудағы рөлін ерекше атап өтті.
– «Жас сақшы» сыныптарының ашылуы – өскелең ұрпаққа тәртіп, заңға құрмет және ең жақсы адами қасиеттерді үйретудің маңызды бағыты. Мұндай орталарда тәрбиеленген жасөспірімдер Отанын қорғауды, адалдық пен әділдікті бағалауды ерте үйренеді. Бүгінгі кадеттер ертеңгі күні елдің заңын қорғап, қоғам қауіпсіздігін қамтамасыз ететін абыройлы азаматтарға айналатынына сенемін, – деді Маулен Ахметов.
Жаңа оқу жылының басында ашылған бұл бастама оқушыларға ерекше серпін берді. Кездесу барысында оқушылар ішкі істер органдарындағы қызметтің мәні, полиция жұмысының бағыттары, құқықтық тәртіпті сақтау үшін атқарылатын күнделікті міндеттер туралы толығырақ ақпарат алды. Олар полиция қызметкерлерінің қоғамдағы орны, тәртіпті қамтамасыз етудегі жауапкершілігі жайлы да ой түйді.
Айта кетейік, өткен жылы Шымкент қаласында осындай үш «Жас сақшы» сыныбы ашылған болатын. Ол жерде оқушылар тек теориялық білім алып қана қоймай, әскери дайындық дағдыларын меңгеріп, құқық негіздері бойынша сабақтарға қатысуда. Мұндай сыныптарда балалар саптық дайындықпен айналысып, полиция қызметінің қыр-сырын біліп, болашақ мамандық таңдауға ерте бағыт алады.
Салтанатты іс-шараның барысында полицейлер оқушыларды жаңа оқу жылының басталуымен шын жүректен құттықтап, білімді табандылықпен игеруге шақырды. Жас сақшыларға білім алу жолында шыдамдылық пен еңбекқорлық тілеп, алға қойған мақсаттарынан таймай, өз елінің лайықты азаматтары болып өсуіне сенім білдірілді.
«Жас сақшы» бастамасы – бұл тек пәндік бағдарлама ғана емес, ол қоғамда құқықтық мәдениетті қалыптастырудың, жастарды отансүйгіштікке баулудың заманауи тетігі. Мұндай сыныптарда оқушылардың бойына заңды сыйлау, қоғамға құрметпен қарау, қауіпсіздікке мән беру секілді қасиеттер дарытылып, оларды алдағы өмір жолына дайындайды.
Жаңа сыныптың ашылуы – Шымкент қаласындағы білім беру мен құқық қорғау саласының ортақ еңбегінің нәтижесі. Бұл жоба жастардың тәрбиесінде маңызды рөл атқарып, олардың келешекте елдің тыныштығы мен қауіпсіздігін сақтауға үлес қосатын тұлға болып қалыптасуына жол ашады.
Пікір қалдыру