Шымкент қаласында өрт сөндірушілер мен полиция қызметкерлері бірлесіп, арнайы рейдтік іс-шара ұйымдастырды. Шараның негізгі мақсаты – жарқылдауық маягі мен арнайы дыбыс сигналы қосылған көліктердің қозғалысына кедергі келтіретін жағдайлардың алдын алу және жүргізушілердің жауапкершілігін арттыру.
Іс-шара барысында жол-патрульдік қызметі Шымкент қаласының №9 мамандандырылған өрт сөндіру бөлімінің арнайы автокөлігін алып жүруді қамтамасыз етті. Полиция экипажы қала көшелеріндегі жағдайды бақылап, төтенше жағдайлар қызметінің көлігімен бетпе-бет келген кездегі жүргізушілердің іс-әрекеттерін бағалады. Бұл тәжірибелік рейд құтқару қызметінің жұмысына кедергі келтіретін факторларды анықтауға мүмкіндік берді.
Тәжірибе көрсеткендей, қаладағы жүргізушілердің басым көпшілігі түсіністік танытып, құтқарушылардың көлігіне кедергісіз жол берді. Олар қозғалыс бағытын өзгертіп, жолақтарын босатып немесе тоқтап, арнайы техниканың өтуіне жағдай жасады. Бұл қадамдар азаматтардың жауапкершілігі мен төтенше жағдай кезінде уақыттың қаншалықты маңызды екенін түсінетінін айғақтайды.
Алайда, рейд барысында тәртіп бұзған жағдайлар да тіркелді. Арнайы дыбыс сигналы мен жарық шамдары қосылған өрт сөндіру көлігінің қозғалысына жол бермеген бір жүргізушіге қатысты полиция қызметкерлері әкімшілік хаттама толтырды. Құқық қорғаушылардың айтуынша, мұндай әрекеттер тек заң бұзушылық қана емес, сонымен қатар адамдардың өмірі мен қауіпсіздігіне тікелей қауіп төндіреді.
Өрт сөндірушілер мен құтқарушылар тұрғындардан арнайы көліктерді көрген сәтте жолды дереу босатуды өтінеді. Төтенше жағдай кезінде әрбір секундтың маңызы зор. Кешігудің немесе жолды бөгеп қоюдың салдарынан үлкен шығынға, тіпті адам өмірін сақтап қалу мүмкіндігінің жоғалуына әкелуі мүмкін.
Рейд барысында құтқарушылар да түсіндіру жұмыстарын жүргізіп, жүргізушілерге арнайы автокөліктердің қозғалысына кедергі жасамаудың маңызын түсіндірді. Олар тұрғындарға қарапайым ережелерді есте сақтауды ұсынады: егер маягі мен дыбыс сигналы қосылған көлік жақындаса, дереу жол беріп, өтуіне жағдай жасау қажет. Бұл – әрбір азаматтың адам өмірін құтқаруға қосқан үлесі.
Іс-шара соңында полиция мен төтенше жағдайлар қызметінің өкілдері бірлескен рейдтердің алдағы уақытта да жалғасатынын атап өтті. Мұндай қадамдар жүргізушілер арасында құқықтық мәдениетті қалыптастыруға, қоғамдық жауапкершілікті арттыруға және ең бастысы – қала тұрғындарының қауіпсіздігін қамтамасыз етуге бағытталған.
Шымкент қаласының өрт сөндірушілері мен полицейлері тағы да қала тұрғындары мен қонақтарына үндеу жасайды: құтқару қызметінің көліктеріне жол беріңіздер, өту жолдарын жаппаңыздар, құтқарушылардың жұмысына кедергі жасамаңыздар. Уақытылы босатылған жол – аман қалған өмірдің кепілі.
Пікір қалдыру