2025 жылдың 1 тамызы мен 20 қазаны аралығында Созақ ауданында Ұлттық ауыл шаруашылығы санағы өтуде. Бұл — еліміздің аграрлық секторындағы құрылымдық көрсеткіштер, өндірістік әлеует пен ресурстар туралы нақты әрі жан-жақты мәліметтерді жинауға бағытталған маңызды науқан. Ауыл шаруашылығы — Қазақстан экономикасының стратегиялық саласы, ал оның даму бағытын дұрыс жоспарлау мен мемлекеттік қолдауды тиімді жүзеге асыру үшін осындай санақтардың маңызы зор.
Ұлттық ауыл шаруашылығы санағы екі кезеңде жүзеге асырылады. Бірінші кезең – 1–31 тамыз аралығында sanaq.gov.kz порталында онлайн сауалнама түрінде өтті. Бұл кезеңде ауыл шаруашылығымен айналысатын ұйымдар мен жеке қосалқы шаруашылық иелері электронды форматта сауалнама толтыру арқылы өз мәліметтерін тіркеуге мүмкіндік алды. Ал екінші кезең — 20 қыркүйек пен 20 қазан аралығында арнайы оқытылған интервьюерлер халық арасында үйме-үй аралау арқылы сауалнама жүргізіп, мәліметтерді жинақтауда.
Санақ аясында ауыл шаруашылығымен айналысатын барлық субъектілер қамтылады. Атап айтқанда, мал шаруашылығы, егіншілік және балық шаруашылығымен шұғылданатын шаруа немесе фермер қожалықтары, заңды тұлғалар, жеке кәсіпкерлер, сондай-ақ өз үйінде мал, құс ұстайтын немесе бау-бақша өсіретін жеке қосалқы шаруашылық иелері де есепке алынады. Бұл шараның ерекшелігі – тек ірі шаруашылықтар ғана емес, үй маңындағы қосалқы шаруашылықтар да назардан тыс қалмайды.
Жиналатын негізгі деректерге шаруашылықтың жер көлемі, егіс алқаптарының түрлері мен көлемі, мал мен құстың саны, ауыл шаруашылығы техникасы мен инфрақұрылымы, суармалы егістік жағдайы, тыңайтқыштар мен агротехникалық әдістердің қолданылуы сияқты мағлұматтар жатады. Бұл мәліметтер кейін ауыл шаруашылығы саласына арналған стратегиялық жоспарларды әзірлеуде, мемлекеттік қолдау тетіктерін бағыттауда және азық-түлік қауіпсіздігін қамтамасыз етуде негіз болады.
Онлайн қатысу мүмкіндігі де қарастырылған. Барлық ауыл тұрғындары мен шаруа қожалықтары sanaq.gov.kz сайты арқылы сауалнаманы өз бетінше толтыра алады. Егер сұрақтар туындаса, 1446 нөміріне хабарласып, кеңес алуға немесе sanaq-Myrza атты виртуалды көмекші арқылы қажетті ақпарат алуға болады. Сонымен қатар, жергілікті әкімдіктер мен статистика бөлімшелерінде азаматтар үшін арнайы «өзін-өзі қызмет көрсету» бұрыштары да жұмыс істеп тұр.
Бұл санақтың маңыздылығы туралы Созақ ауданы әкімінің орынбасары Серік Маманов пен аудандық статистика басқармасының басшысы Марат Бегалиев жергілікті БАҚ өкілдеріне берген сұхбатында айтып өтті. Олар бұл науқанның аудандағы ауыл шаруашылығы саласының қазіргі жағдайын толық зерделеуге мүмкіндік беретінін, әрі жергілікті әкімдіктер мен шаруалар үшін үлкен көмек болатынын атап өтті.
Санақ нәтижелерінің алдын ала қорытындысы 2025 жылдың желтоқсан айында жарияланады. Ал толық есеп пен талдау 2026 жылы ұсынылады. Бұл деректер ұлттық деңгейде қабылданатын экономикалық шешімдердің сапасын арттырып, ауыл шаруашылығын қолдауға бағытталған нақты механизмдерді жетілдіруге жол ашады.
Ауыл шаруашылығы – ел экономикасының жүрегі, халықтың әл-ауқатының айнасы. Сондықтан әрбір шаруа, әрбір тұрғын өз мәліметін дер кезінде, нақты әрі шынайы ұсынса, мемлекет пен қоғам үшін тиімді болары сөзсіз. Ұлттық ауыл шаруашылығы санағы – болашақ аграрлық саясаттың берік негізі.
Пікір қалдыру