Түркістан облысының әкімі Дархан Сатыбалдының төрағалығымен сәулеттік жобалар талқыланған жиын өтті. Онда Түркістан қаласы мен облыс аумағындағы елді мекендерде қолға алынатын сәулеттік жобалар сараланды. Атап айтқанда, Түркістан қаласындағы әкімшілік-іскерлік орталығында салынатын имандылық асхана сарайы мен балабақша жобасы қаралып, осы аумақтағы тұрғын үй кешендерінің және коммерциялық нысандардың қасбеттерін әрлеу үлгілері көрсетілді. Мәдениет үйі мен жаңа саябақ үлгісі, «Күлтөбе қалашығы» және «Ұлы Жібек жолы» жобалары пысықталды.
Жобалардың сәулеттік кейіпі бойынша ұсыныстарды тыңдаған облыс басшысы сапаға аса мән беруді, кейбір жобаларға өзгеріс енгізуді тапсырды.
– Сәулеті, құрылысы талапқа сай жүргізілетін, жұмыс орындарын ашуға мүмкіндік беретін нысандарды салуға жер, инфрақұрылым тарапынан қолдау болады. Бірақ кәсіпкерлер бізге жол картасын ұсынып, жұмысты уақтылы бастауы тиіс. Егер құрылыс кешеуілдесе, жер мемлекетке қайтарылады, – деді Дархан Сатыбалды.
Облысқа қарасты аудан, қалаларда бой көтеріп жатқан нысандардың сапасымен қатар, сәулеті де назарға алынған. Жиын барысында Келес, Сауран және Сарыағаш аудандырында салынатын Мәдениет үйлерінің жобалары да пысықталды. Сонымен қатар Жетісай, Мақтаарал, Ордабасы, Сарыағаш, Шардара аудандары мен Арыс қаласындағы ғимараттар мен жалға берілетін тұрғын үйлер жобасына ұсыныстар айтылды.
Сондай-ақ, осы,ан дейін облыс басшысы Дархан Сатыбалды инвесторлардың жобаларымен, жоспарларымен танысты.
Түркістанға инвестиция тартып, жаңа ғимараттар салуға ниеттілер қатары азайған емес. Кәсіпкерлер тарапынан ұсыныстар бар. Солардың бірқатарының сәулеттік жобасы арнайы мәжілісте талқыланды.
– Өңірде салынатын ғимараттар сәулетті әрі заман талабына сай болуы тиіс. Сапасына мән берілсін. Сәулетшілердің мақұлдауынан өткен жобаларға қолдау көрсетіледі. Екіншіден, келісім жасалған соң құрылыс жедел басталуы тиіс. Созбалаңға салып жүруге жол берілмейді, – деді облыс әкімі.
Жиында жеке инвесторлар өз ұсыныстарын ортаға салды. Өңірде жобаларды жүзеге асыруға қолайлы жағдай қалыптасқанын айтқан олар арнайы жер берілсе, жұмыстарын бастамақ. Кәсіпкерлер көпқабатты тұрғын үйлер, монша, автосалон, жекеменшік емхана, сауықтыру нысандары мен спорт кешендерін салуға қызығушылық танытып отыр.
Жаңа ғимараттардың сыртқы әрлеу жұмысы, ішкі дизайны мен сыртқы көрінісіне қатысты сәулеттік үлгілер талқыланып, мамандар тарапынан тиісі бағалар берілді. Сәулетшілердің сын-ескертпелері хаттамаға енгізіліп, құрылыс барысында назарға алынады.
Авторы: Бексұлтан Орынбасар
Пікір қалдыру