Адам мен табиғаттың арасындағы байланыс – аса нәзік әрі жауапты қатынас. Табиғат – біздің тіршілігіміздің алтын арқауы, өмір сүру ортамыз. Сондықтан да оны қорғау, аялау, ластамау – әрбір азаматтың борышы. Осы ұстанымды негізге ала отырып, Дүниежүзілік қоршаған ортаны қорғау күніне орай Созақ ауданында кең ауқымды сенбілік ұйымдастырылды.
Экологияны сақтау және елді мекендердің санитарлық жағдайын жақсарту мақсатында өткен бұл шараға барлық ауылдар мен елді мекендер белсенді қатысты. Сенбілік барысында аудан тұрғындары, мемлекеттік мекеме қызметкерлері, жастар ұйымдары мен еріктілер бірлесіп тазалық жұмыстарын жүргізді. Бұл – жерге деген жанашырлықтың жарқын көрінісі.
Шолаққорған ауылында ұйымдастырылған сенбілік ерекше қарқынмен өтті. Ауыл 5 секторға бөлініп, 144 көшеде тазалық және көгалдандыру жұмыстары жүргізілді. Әр мекеме өздеріне тиесілі аумақта тазалық шараларын атқарды. Ішкі көшелер, саябақтар, ауыл сырты мен айналма жолдар тұрмыстық қалдықтардан тазартылып, су өткізу жүйелері де ретке келтірілді. Бұл – бір күндік акция емес, ұзақмерзімді нәтиже беретін маңызға ие қадам.
Сонымен қатар, табиғатпен біте қайнасқан Созақ, Құмкент және Жартытөбе ауылдарында «Мөлдір бұлақ» акциясы ұйымдастырылып, өзен-көл жағалаулары мен арық-атыздар тазартылды. Су арналарының еркін ағысы қалпына келтіріліп, табиғи су көздерінің таза сақталуына мән берілді. Бұл тек санитарлық шара ғана емес, экологиялық мәдениетті қалыптастыруға бағытталған тәрбиелік іс.
Сенбілікке барлығы 6500-ден астам адам қатысып, 30-ға жуық арнайы техника жұмылдырылды. Жүргізілген жұмыстар нәтижесінде 20 шақырымнан астам өзен-көлдер мен арық жүйелері тазартылып, 110 тоннаға жуық тұрмыстық қалдықтар арнайы полигонға шығарылды. Бұл – елдің табиғатына деген жанашыр көзқарастың нақты көрінісі.
Мұндай ауқымды сенбіліктер тұрғындардың табиғатқа деген жауапкершілігін арттырып қана қоймай, туған жерге деген сүйіспеншілігін оятады. Жер – біздің аманатымыз. Оны аялау, таза ұстау, ұрпаққа мұра етіп жеткізу – әр азаматтың қасиетті парызы.
Сондықтан «Жерге деген құрметті тазалықтан бастау керек» деген сөз тек ұран емес, өмірлік қағидаға айналуы тиіс. Тазалық – тәртіптің, мәдениеттің, ең бастысы, табиғатқа деген құрметтің белгісі. Осы бағыттағы жұмыстар алдағы уақытта да жалғасын табатыны сөзсіз.
Пікір қалдыру