Созақ ауданы – Түркістан облысының ауыл шаруашылығына бейімделген өңірлерінің бірі. Биыл аудан диқандары егін егу және ору жұмыстарына ерекше дайындықпен кірісті. Қазіргі уақытта өңірде жиын-терін науқаны қызу жүріп жатыр. Атап айтқанда, шаруалар арпа дақылдарын орып, маусымдық жұмыстарды жүйелі түрде атқарып келеді.
Аудан әкімі Мұхит Тұрысбеков Жон аймағындағы егіс алқаптарын аралап, науқан барысымен жеке танысты. Сапар барысында ол бірқатар шаруа қожалықтарының жетекшілерімен кездесіп, өнім шығымдылығы, ауа райының әсері және жалпы агротехникалық шаралардың сапасына қатысты мәселелерді талқылады.
Атап өтерлігі, «Камила РБР» ЖШС биыл 240 гектар алқапқа арпа еккен болса, «Өмір» шаруа қожалығы негізінен бидай өсірумен айналысады. Қожалық өкілдерімен әңгіме барысында аудан басшысы өнім көлемі мен сапасына назар аударып, мемлекет тарапынан көрсетілетін қолдаулар туралы ақпарат берді.
Шаруалар биыл орын алған қуаңшылықтың егінге кері әсер еткенін жеткізді. Жаңбырдың аз түсуі мен күннің шіліңгір ыстығы салдарынан кейбір алқаптарда өнім көлемі төмендеп кеткен. Соған қарамастан, диқандар бар мүмкіндікті пайдаланып, егінді дер кезінде орып алуға күш салып отыр.
Аудан көлемінде биыл:
-
1438 гектарға арпа,
-
370 гектарға бидай,
-
1100 гектарға мақсары,
-
760 гектарға жүгері дақылдары егілген.
Мұның сыртында, мал азығын дайындау, егіс алқаптарын әртараптандыру және тыңайтқыштар қолдану жұмыстары да қатар атқарылуда. Аудан әкімдігі тарапынан агросекторға қажетті қолдаулар мен мемлекеттік бағдарламалар аясындағы субсидиялар жайы тұрақты бақылауда. Сонымен қатар, фермерлерге агрономиялық кеңестер беріліп, техникамен қамтамасыз ету жұмыстары жүргізілуде.
Созақ ауданы – климаттық жағдайы күрделі болса да, еңбекқор шаруалардың арқасында ауыл шаруашылығы саласында тұрақты өсім көрсетіп келе жатқан өңір. Болашақта тамшылатып суару, цифрлы егіншілік сынды заманауи әдістерді енгізу арқылы өнімділікті арттыру көзделіп отыр.
Пікір қалдыру