Шымкент қаласында тағы бір ірі интернет алаяқтық дерегі тіркелді. Қала тұрғыны белгісіз тұлғалардың қитұрқы әрекетіне алданып, жиған-тергенінен айрылып қалды. Тергеу мәліметінше, жәбірленуші алаяқтардың жалған уәделеріне сеніп, жалпы сомасы 25 миллион теңге көлеміндегі қаражатын олардың көрсеткен шоттарына аударған. Бұл оқиға киберқылмыстың әлі де кең таралғанын және азаматтардың сақтық шараларын қатаң ұстануы қажеттігін көрсетіп отыр.
Алайда қылмыскерлер мұнымен шектелмеген. Жәбірленушінің айтуынша, белгісіз адамдардың бірі онымен бейнеқоңырау арқылы байланысқа шығып, өзін құқық қорғау органы қызметкері ретінде таныстырған. Ол әйелге жалған ақпарат ұсынып, сеніміне кіріп, тағы да ақша алуға әрекеттенген. Бақытымызға орай, бұл жолы азаматша дер кезінде күмәнданып, алаяқтардың арбауына түспей, бірден киберполицияға жүгінген.
Киберполиция мамандары жәбірленушіге алаяқтардың жиі қолданатын тәсілдерін түсіндіріп берді. Олар, әдетте, адамдарды психологиялық тұрғыда қысымға алып, шұғыл шешім қабылдауға мәжбүрлейді, өзін банк қызметкері не құқық қорғау органының өкілі ретінде таныстырады немесе инвестициялық жобаларға қатысуға үгіттейді. Бұл әрекеттердің барлығы сенімге кіріп, азаматтарды шатастырып, заңсыз жолмен ақша иемденуді көздейді.
Полиция осындай жағдайға тап болған әрбір тұрғынға негізгі қауіпсіздік ережелерін ұстануды қатаң ескертеді. Ең алдымен, интернеттегі бейтаныс адамдардың ұсыныстарына сенбеу керек. Әсіресе күмәнді шоттарға ақша аудару үлкен қатерге әкелуі мүмкін. Егер сізге белгісіз нөмірден қоңырау шалынса, бейнеқоңырау арқылы өзін мемлекеттік орган қызметкері ретінде таныстырса немесе қаржы аударуды талап етсе, дереу тоқтап, ресми дереккөздер арқылы ақпаратты тексерген жөн.
Құқық қорғау органдары мұндай қылмыстардың алдын алуға азаматтардың сақтығы мен сергектігі тікелей әсер ететінін айтады. Егер алаяқтық белгілері байқалса, уақтылы полицияға хабарлау өте маңызды. Өйткені жедел әрекет ету арқылы қылмыскерлердің ізін суытпай анықтау мүмкіндігі артады.
Қазіргі таңда Шымкент қалалық Полиция департаменті бұл фактіге қатысты тексеру амалдарын жүргізуде. Мамандардың мәлімдеуінше, интернет алаяқтарының әрекеттері жыл сайын түрленіп, жаңа әдістермен толықтырылып келеді. Сондықтан әрбір тұрғын өз қаржысын қорғаудың қарапайым жолдарын есте сақтап, күмәнді ұсыныстарға жоламауы тиіс.
Полиция ескертеді: интернеттегі бейтаныс тұлғаларға сенбеңіздер, күмәнді шоттарға ақша аудармаңыздар, күдікті әрекет байқалған жағдайда дереу полицияға жүгініңіздер. Бұл ереже қаражатты қорғап қана қоймай, қылмыскерлердің еркін әрекет етуіне тосқауыл бола алады.
Пікір қалдыру