Мемлекет басшысы Қасым-Жомарт Тоқаев Goldman Sachs Global Institute компаниясының жаһандық мәселелер бойынша президенті Джаред Коэнмен кездесу өткізді.
Кездесу барысында Қазақстан мен әлемдегі жетекші инвестициялық банктердің бірі — америкалық Goldman Sachs арасындағы ынтымақтастық мәселелері талқыланды. Қасым-Жомарт Тоқаев компанияның Қазақстан Ұлттық банкімен орнатқан ұзақ мерзімді серіктестігін жоғары бағалап, өзара ықпалдастықтың стратегиялық мәніне тоқталды.
Президент атап өткендей, Қазақстан экономиканы әртараптандыру, қаржы секторын дамыту және цифрлық технологияларды енгізу бағытында нақты қадамдар жасап келеді. Бұл ретте заманауи қаржылық технологиялар, цифрлық экожүйелер мен жасанды интеллектті дамыту елдің басты басымдықтарының бірі саналады. Мемлекет басшысы аталған бағыттарда халықаралық серіктестікке, соның ішінде Goldman Sachs сияқты ірі қаржы институттарының тәжірибесіне ерекше мән берілетінін атап өтті.
Өз кезегінде Джаред Коэн Goldman Sachs компаниясының цифрлық шешімдер саласындағы бастамалары туралы кеңінен баяндады. Атап айтқанда, ол Goldman Sachs Digital Asset Platform цифрлық активтер тұғырнамасының мүмкіндіктеріне тоқталып, оның жаһандық қаржы жүйесіне енгізіліп жатқан тәжірибесімен бөлісті. Бұл платформа цифрлық активтерді басқару, қауіпсіздік, ашықтық және сенімділік тұрғысынан жаңа стандарттар қалыптастыруды көздейді.
Кездесу барысында тараптар цифрлық қаржы инфрақұрылымын дамыту, деректермен жұмыс істеу, сондай-ақ инновациялық қаржы құралдарын енгізу салаларында ынтымақтастық орнату мүмкіндіктерін талқылады. Президент бұл бағыттардағы тәжірибе алмасу Қазақстанның қаржы нарығының тұрақтылығы мен ашықтығын арттырып, инвестициялық тартымдылығын нығайта түсетінін атап өтті.
Кездесу нәтижесінде екі тарап Қазақстан мен Goldman Sachs арасындағы өзара іс-қимылды тереңдетуге ниетті екендерін білдірді. Бұл ынтымақтастық болашақта цифрлық экономиканы дамыту мен қаржы секторын заманауи талаптарға бейімдеуге өз үлесін қосады деп күтілуде.
Пікір қалдыру