Шымкент қаласында Шардара ауданының «Туған жер – алтын бесігім!» атты облыстық фестивалі басталды. Ораза айтының бірінші күніне тура келгендіктен шардаралықтар іс-шараны қайырымдылық шарасынан бастағанды жөн көрді. Таң азанымен Шымкент қалалық Абдулхамит Қаттани мешітінде айт намазы оқылып болған соң Шардара ауданы әкімінің орынбасары Бақтыбай Әліпов көмекке мұқтаж 50 азаматқа азық-түлік себеттерін табыстады.
-Бүгін біздің Шардара ауданы «Туған жер – алтын бесігім» атты фестиваль аясында он түрлі іс-шара өткізіп, Шымкент қаласының тұрғындарына шағалалы өңірдің рухани-мәдени өмірін, экономикалық-әлеуметтік жетістіктерін таныстырады. Бұл шара Елбасымыз Н.Ә.Назарбаевтың «Болашаққа бағдар: рухани жаңғыру» атты мақаласындағы «Туған жер» бағдарламасы бойынша ұйымдастырылып отыр. Осынау үлкен іс-шарамыздың басын сіздерге айттық беруден бастағымыз келді. Айттарыңыз қабыл болсын, — деп Бақтыбай Қиянбекұлы құттықтау сөз сөйледі.
Б.Әліповпен бірге қала әкімі Н.Сапаров, аудандық жұмыспен қамту дәне әлеуметтік бағдарламалар бөлімінің басшысы Ж.Тұрлыбеков іс-шараға қатысып, тұрғындарға азық-түлік себеттерін тапсырды. Шардаралықтардан айттық алған қала тұрғындары осынау іске ризалықтарын білдірісті. 83 жастағы қария Райхан Баймұқашева сауапты тірлік жасаған азаматтарға ақ батасын берді.
Абдулхамит Қаттани мешітінің найб-имамы Қазыбек Сарыбаев шардаралықтардың қайырымдылық шарасына ниет қабыл болсын айта отырып, мешіт ішінде құран оқыды.
Шардара ауданы әкімінің баспасөз қызметі
Пікір қалдыру