Отырар аудандық мәдениет сарайында Астана күніне арналған «Астана арман қала» атты мерекелік кеш өтті. Кеш басталмас бұрын аудан басшылары және қонақтар мәдениет сарайының кіре берісіне қойылған Отырар мемлекеттік археологиялық қорық-мұражайы мен Әбу Насыр әл-Фараби атындағы руханият мұражайының көрмесін тамашалады.Ұлт аспаптары оркестрі Құрманғазының «Балбырауын» күйімен шымылдығын түрген мерекелік кеште аудан әкімі Ерлан Айтаханов көпшілікті 6 шілде-Астана күні мерекесімен шын жүректен құттықтап, «Еліміздің жүрегіне айналған Астана қаласы 20 жыл ішінде әлемдегі саяси маңызды оқиғалар өтетін орталыққа айналды. 1998 жылы ЮНЕСКО-ның шешімімен Астанаға «Әлем қаласы» деген жоғары атақ берілді. Дәл қазіргі таңда Астана төрінде ЭКСПО -2017 мамандандырылған көрмесі өтуде. Оған әлемнің түкпір-түкпірінен мемлекеттер қатысып, Астана қаласының бүгінгі көз тоймас көркіне, сәулетті сымбатына таңданыстарын білдіруде»- деп өзінің ыстық лебізін білдірді. Мерекелік шара барысында бір топ сала қызметкерлері аудан әкімінің Алғыс хаттарымен марапатталды.
Ауданымыздан түлеп-ұшып, бұл күнде облысымыз бен республикамыздың сахналарында өнер көрсетіп жүрген өнер жұлдыздары көрермендерге тамаша көңіл-күй сыйлап, мерекелік шараның соңы аудан өнерпаздарының концерттік бағдарламасына ұласты.
Пікір қалдыру