Спорт – денсаулық кепілі. Салауатты ұрпақ – мемлекет тірегі. Қазақ спортының мәртебесін көтеру және барынша қолдау Мемлекет басшысының тұрақты назарында. Осы бағытта Түркістан қаласында жасөспірімдер арасындағы спорттық сайыстар жалғасуда. Қалалық «Балалар мен жасөспірімдер спорт клубы» ұйымдастырған шарада баскетбол мен үстел теннисінен жарыс өтті.
Баскетболдан шаһардағы Отырар тұрғын алабында өткен сайыста Төле би атындағы №19 мектеп оқушылары алғашқы орынды иеленіп, екінші орын №28 мектеп-лицейіне, үшінші орын Ж.Тәшенов атындағы №23 мектеп командасына бұйырды.
Ал үстел теннисінен өткен Шауғар тұрғын алабындағы жарыста қаладағы 9 мектептен жиналған жас спортшылар бақ сынады. Нәтижесінде ұлдар арасында I орынға Ибраһим Әбсаматов, II орынға Алмас Ибрайымов, III орынға Дилшод Парманаулов ие болды. Қыздар арасында алғашқы орын Зухра Мұхамеджанға бұйырса, екінші орынды Насиба Исахан, үшінші орынды Угилай Аширметова иеленді.
Айта кетейік, жасөспірімдер арасындағы спорттық сайыстар 11 қыркүйектен бері кезең-кезеңімен өткізілуде. Бұған дейін шахмат, тоғызқұмалақ пен волейболдан жарыс өтіп, жеңімпаздар анықталған. Алдағы уақытта сайыс Бекзат секторында дойбы спорт түрінен жалғасады.
Алты жыл бұрын Түркістан облысы құрылып, Түркістан қаласы оның орталығы болып бекітілгені мәлім. Осы уақыт ішінде өңірде қолға алынып, атқарылған шаруа ауыз толтырып айтарлықтай. Әлеуметтік- экономикалық, білім мен денсаулық саласын айтпағанда, спорт саласын дамытуға ерекше мән берілді. Әрине, мұның барлығы тұрғындардың денсаулығын нығайтумен қоса, жастардың алтын бос уақытын текке өткізбей, спортпен шұғылдануына жағдай жасауды көздеген. Жастардың назарын спортқа бұрып, салауатты өмір салтына баулу — жастар саясатындағы басты мақсаттардың бірі. Жастайынанкүресіп, доп теуіп өссе, небір дарабоз спортшылардың өсіп шығары анық. Түркістан қаласының спорт саласындағы бүгінгі күндегі әр жетістігі, басчтапқыдағы мақсаттардың орындала бастағанының көрінісі.
Пікір қалдыру