Созақ ауданы үшін тіршілік көзінің бірі – Фурманов су торабы мен оған жалғас 120 шақырымдық айналма канал. Бұл канал Шу өзенінің суын өңірдегі ауыл шаруашылығы мен тұрмыстық қажеттіліктерге бағыттауға арналған стратегиялық нысан болып табылады. Алайда жылдар бойғы күтімсіздік пен табиғи тозу салдарынан каналдың қазіргі жағдайы күрделі мәселеге айналған еді.
Мәселені шешу үшін биыл Қазақстан Республикасы Су ресурстары және ирригация министрлігі нақты қадамдар жасауда. Жуантөбе ауылында өткен кездесуде министр Нұржан Нұржігітов өңір тұрғындарымен жүздесіп, сумен қамтамасыз ету бағытында атқарылып жатқан жұмыстар мен алдағы жоспарлар туралы жан-жақты баяндады.
– «Біздің министрлік Созақ ауданына тұрақты әрі жүйелі түрде су жеткізуді басты міндеттердің бірі санайды. Биыл Шу өзенінің суын реттеудің нәтижесінде ауданға су әдеттегіден бір айға ерте келді. Қазіргі уақытта өткен жылмен салыстырғанда 300 миллион текше метрге артық су жіберілді. Бұл тек бастамасы ғана. Мамыр айының соңына дейін секундына 85 текше метрге дейін су беру жоспарланып отыр», – деді министр өз сөзінде.
Жиында Фурманов каналының жағдайы да кеңінен талқыланды. Бұл нысан Созақ ауданына бағытталатын судың негізгі арнасы болғанымен, бүгінде оның құрылымын қалпына келтіру қажеттілігі туындап отыр. Министр Нұржігітов канал бойымен арнайы жүріп өтіп, оның қазіргі жағдайымен танысты. Нәтижесінде канал құрылымын жаңарту, тазарту және жөндеу жұмыстарына қатысты жобалық-сметалық құжаттарды дайындауды жеделдетуді тапсырды.
Бұл жұмыс Түркістан облысы әкімінің жеке бақылауында. Облыс әкімінің орынбасары Нұрбол Тұрашбеков:
– «Фурманов каналының қайта жандануын облыс басшылығы ерекше назарда ұстап отыр. Құжаттарды рәсімдеу жұмыстары аяқталуға жақын. Жөндеу жұмыстарын шілде айында бастау жоспарланып отыр. Бұл бастама тек заң аясында ғана емес, техникалық регламенттерге де толық сәйкес келуі тиіс», – деп атап өтті.
Аталған жаңарту жұмыстары жүзеге асса, Созақ ауданының егіншілігі мен мал шаруашылығына арналған су тапшылығы едәуір азайып, ауыл шаруашылығы өнімділігі артады деп күтілуде. Сонымен қатар, судың дәл әрі тиімді бөлінуі арқылы суармалы жерлерді ұлғайтуға мүмкіндік туады.
Фурманов каналы – бір ғана инфрақұрылымдық нысан емес, бұл – ауданның агроөнеркәсіптік әлеуетін нығайтатын өмірлік маңызы бар жоба. Жөндеу жұмыстары аяқталған соң, канал арқылы тасымалданатын су көлемі артып, ауыл тұрғындарының тұрмыстық және шаруашылық қажеттіліктерін тұрақты түрде өтеуге жол ашылады.
Осылайша, ауданның болашағы үшін маңызды саналатын Фурманов каналының жаңғыруы – тек техникалық емес, стратегиялық серпіліс. Бұл бастама Созақтың әлеуметтік-экономикалық дамуында жаңа кезеңнің бастамасына айналмақ.
Пікір қалдыру