Отырарда халықаралық далалық семинар болып өтті

Отырар ауданында «Тұзданған топырақтарды жаңа инновациялық технологияларды қолдану арқылы жүгері дақылының өнімін арттыру» тақырыбында халықаралық далалық семинар өтті. Семинарға Түркия, Қытай, Өзбекстан және Қырғызстаннан ауыл шаруашлық өнімімен шұғылданатын компания басшылары мен менеджерлері, сондай-ақ, елімізге белгілі ғалымдар, облыстық ауыл шаруашлығы басқармасының қызмеркерлері қатысты.Семинарда аудан әкімі Ерлан Айтаханов Елбасы Нұрсұлтан Назарбаевтың «Болашаққа бағдар: рухани жаңғыру» атты мақаласындағы «Ықылым замандардан бері ұрпақтан ұрпаққа жалғасып келген ұлттық прагматизм санаулы жылда адам танымастай өзгеріп, ас та төк ысырапшылдыққа ұласты. Соның кесірінен, Жер-Ана жаратылғаннан бері шөбінің басы тұлпарлардың тұяғымен ғана тапталған даланың барлық құнары құрдымға кетті. Түгін тартсаң майы шығатын мыңдаған гектар миялы жерлеріміз экологиялық апат аймақтарына, Арал теңізі аңқасы кепкен қу медиен шөлге айналды», — деп бүгінгі қазақ даласы туралы Ұлт Көшбасшысының толқынысын жеткізді. Экологиялық апаттың алдын-алу, топырақтың құнарлылығын арттыру, шаруалардың еңбек өнімдерін еселеу мақсатында қолға алынған жобаларды тарқата айтқан аудан басшысы ауданымыздағы жүгері кластерін дамыту және суармалы жерлердің тұздануы және су тапшылығын шешу бағытында атқарылып жатқан жұмыстарға да кеңінен тоқталды.