Осы жылдың ақпан-мамыр айлары аралығында Мақтаарал ауданында «Үздік ауылдық округ» атты абаттандыру тақырыбында байқау жарияланды. Халықты өмір сүруге қолайлы жағдай туғызуға тарта отырып, аудан тұрғындарының арасында туған жерге деген мақтаныш сезімін ояту – байқаудың негізгі мақсаты болатын. Байқау комиссиясының төрағасы Т.Жүнісовтың айтуынша, аудан 3 өңірге бөлініп, байқау нәтижесі әр өңірге бөлек белгіленіп, үздіктер жеке-жеке марапатталды. «Асықата» өңірі бойынша І орынды Ш.Ділдәбеков ауылдық округі иемденсе, ІІ орынды «Ж.Ералиев», ІІІ орынды «Атамекен» ауылдық округтері алды. Ал, «Мырзакент» өңірінен І орынды «Ж.Нұрлыбаев», ІІ орынды «Мақтарал», ІІІ орынды «Бірлік» ауылдық округтері еншіледі. Сондай-ақ, «Жетісай» өңірі бойынша «А.Қалыбеков» ауылдық округі І орын, «Жаңа ауыл» ауылдық округі ІІ орын, «Қарақай» ауылдық округі ІІІ орынды алды. Жүлде қоры: І орындарға – қызметтік жеңіл автокөлік, ІІ орындарға – 300 000 теңге, ІІІ орындарға – 100 000 теңге.
«Ең алдымен, ауылды көркейтуге бағытталған осындай байқауды ұйымдастыруға мұрындық болған аудан әкіміне өз алғысымды білдіремін. Сондай-ақ, жұмысымызды әділ бағалаған комисся құрамына және ауылдық округімізді көркейтуге ат салысқан халқыма ризамын. «Астана күні» мерекесімен баршаңызды құттықтаймын!» — дейді Ш.Ділдәбеков ауылдық округінің әкімі Н.Әбдірайым.Жалпы, байқаудың жеңімпаздары марапатталған гала-концертте Жайдарманның Республикалық премьер-лига ойындарында ерекше өнер көрсетіп жүрген «Жетісай құрамасы» жайдарман тобы, «Әулие ата» аймақтық ашық лигасында топ жарып жүрген «Алақай-балақай» жайдарман тобы көрермендерге күлкі сыйлады. Мерекелік кеште ауданға белгілі әншілер «Астана» туралы әндерді шырқап, концерттің соңы от шашуға ұласты.
(с) Мақтарал ауданы әкімінің баспасөз қызметі
Пікір қалдыру